Kumenyar mawa prabawa, sumirat ambabar tejamaya, saya dangu saya cetha, saya caket saya ngalela, lah punika ta tejaning risang pinanganten kakung pun Bagus ……………(nama pengantin pria) ingkang binayang kare mijil saking wisma palereman, kinanthi manjing sasana pawiwahan.
Gumebyar busananing putra penganten kakung, hangagem busana ingkang tinaretes berang sotya, ngagem kuluk kanigara, hangemba busananing nata, lamun kadulu katon agung, mrabu, miwah mrabawa.
Agung ateges kebak ing kaendahan kang sanyata adi luhung. Mrabu ateges pindha jejering narendra kebekan ing kawibawan luhur, dene mrabawa ateges sinung prabawa adi endah milangoni.
Dhampyak-dhampyak para kadang wandawa ingkang samya hangayap tindak ira putra penganten kakung. Pinangantyan kakung nggennya lumaksana lengkeh-lengkeh pindha singa lupa, riak hanggajah ngoling, sapecak mangu satindak kendel, semu hangungun mulat endah edining swasana ingkang hangrenggani tawinging wiwara.
Wus handungkap unggyan kang tinuju, gya kendel tindak ira wong agung kang pindha narendra, wonten sangajenging wiwara wisma pawiwahan, keparenging sedya hangrantu laksitaning adicara .